Web orrialdeei buruz hitz egiterakoan, ondo landutako oinarri teknikoa eta diseinu erakargarria izateaz gain, beste parametro batzuk ere hartu behar dira kontuan, horien bidez orrialdea erabiltzea eta bertan nabigatzea erraza izan dadin, eta bisitatzen duten pertsonek inolako eragozpenik izan ez dezaten.
Webguneei buruz ari garela, aipatutako erabilgarritasunaren helburua da orrialdeen diseinua, egitura eta banaketa modu jakin batean antolatzea, informazio garrantzitsua, erabiltzaileek ustez bilatzen dutena eta guk eman nahi dieguna, aurkitzeko erraza izan dadin. Gure webgunera edo denda elektronikora jotzen duten pertsonek ez badute bilatzen dutena erraz aurkitzen, etsi egin ohi dute, eta horrek esan nahi du bezero potentzial horiek galtzen ari garela, ez gure produktua txarra delako, modu egokian aurkeztu ez diogulako baizik.
Irisgarritasunak esan nahi du edonork izan behar duela aukera gure webgunea kontsultatzeko, erabiltzen duen nabigatzailea, hitz egiten duen hizkuntza, etxean duen konexio-mota edo gaitasun fisikoa edozein dela ere, adibide batzuk jartzearren. Aukera badugu gure produktua atzerrian saltzeko baina gure web orrialdeak ez badu informazioa beste hizkuntzetan eskaintzen, oztopo bat jartzen ari gara merkatu horietako balizko bezeroei. Gure atariaren diseinuak ez badu ondo funtzionatzen zenbait nabigatzailetan edo gailu mugikorretan, zailtasunak jartzen ari gara bezero potentzialei gure produktu edo zerbitzuetara iristeko.
